યુવક-યુવતી બંને વકીલના ડ્રેસમાં મેટ્રો કોર્ટમાં આવ્યા હતા જેને કારણે વકીલોએ તેમનો વિરોધ કર્યો અને કારંજ પોલીસ મથકે જાણ કરી. વકીલોએ બંને સામે કડક પગલાં લેવાની માગણી કરી છે. VHP અને બજરંગ દળે આક્ષેપ કર્યો છે કે મેરેજ રજિસ્ટ્રાર એમ.એમ. સૈયદ પક્ષપાતી વલણ ધરાવે છે. વકીલોનું કહેવું છે કે મેરેજ રજિસ્ટ્રેશન 11 વાગ્યે શરૂ થતું હોવાથી છોકરો મુસ્લિમ હોવાથી 9:30 વાગ્યે બંનેને લાવવામાં આવ્યા હતા.
બજરંગદળના કાર્યકર્તા ગણેશ વણઝારાએ જણાવ્યું કે હિન્દુ દીકરીને લવજેહાદમાં ફસાવવામાં આવી છે. યુવતીને વકીલના કપડાંમાં કચેરીમાં લઈ જવાઈ હતી. રજિસ્ટ્રાર દ્વારા પ્રોટેક્શન આપવામાં આવી રહી છે અને વકીલના કપડાં પહેરાવીને અંદર રજિસ્ટર કરવામાં આવી રહ્યું છે. દીકરીને પરિવાર સાથે વાત કરાવવામાં આવે તેવી બજરંગદળની માગ છે. દીકરીના કાકાએ જણાવ્યું કે શરદ પૂનમની રાત્રે છોકરીને ભગાડી ગયા હતા અને તે યુવકના દબાણ હેઠળ છે.
બીજી તરફ, કાયદાકીય રીતે પુખ્ત વયના યુવક-યુવતીને પોતાની પસંદગીથી લગ્ન કરવાનો અધિકાર છે, તેમ કાયદા નિષ્ણાતોનું કહેવું છે. હાલ પોલીસ સમગ્ર મામલે તપાસ કરી રહી છે અને બંને પક્ષની રજૂઆતો લઈ રહી છે.મેટ્રો કોર્ટ કમ્પાઉન્ડમાં થયેલા આ હોબાળાને પગલે થોડા સમય માટે તંગદિલી સર્જાઈ હતી, પરંતુ પોલીસ બંદોબસ્ત વચ્ચે પરિસ્થિતિ નિયંત્રણમાં આવી હતી. આગળ કાયદેસરની કાર્યવાહી બાદ જ સમગ્ર મામલે સ્પષ્ટતા થશે..
